من روائع الحكيات

#من_روائع_الحكايات كنت قاعدة مع أحد أصحابي نتكلم عن الرزق و عن انشغالنا به ليل نهار، فقال لي أحدهم: هحكيلك على حاجة حصلت لي من بعدها قررت عمري ماهحسبها ..
كنت مرتب مع صحابي اننا نسافر العين السخنه و حددنا اليوم و ركبنا العربية وطلعنا علي الطريق وقعدنا نرغي ونتكلم مع بعض حوالي ساعتين وفجأه اكتشفنا حاجة ما تتصدقش!! لقينا نفسنا فى الريست  !!!!! اكتشفنا اننا بدل ماناخد طريق السخنة اخدنا طريق السويس  إزاي معرفش! 
والأعجب من كدة ان ولا واحد فينا كلنا اخد باله!! 

المهم طبعا كان مستحيل نلف ونرجع السخنة لأن اليوم كده إتفرتك، فقررنا نشوف أي حد بتاع سمك ناكل عنده اكلة سمك و بعدين نرجع و نكون طلعنا من السفرية دي بأي حاجة.
فضلنا سايقين لحد ماشمينا ريحة سمك حلوة قوي، دخلنا لقينا واحد بتاع سمك كده على قده، وقفنا نختار السمك اللي عايزينه ووقف الراجل يتبله و كان شكله مهموم هم السنين، وفجأة لقيناه بيعيط!! اتفاجئنا، سألناه مالك وبعد محايله كتير قال لنا ان الحال بقاله كام يوم واقف، وبنته تعبانه قوي و محتاجة دواء غالي ضروري و أخيرا ربنا بعت بينا الرزق!!!!
و من كتر فرحته استأذننا ياخد الحساب مقدم علشان يبعت ابنه يجيب الدواء ويوديه البيت!!طبعا احنا كلنا تنحنا! وبعد ماكنا عمالين نتكلم و نضحك و نستغرب احنا ازاي ماخدناش بالنا اننا واخدين طريق تاني خالص، سكتنا.. كلنا سكتنا! علشان فهمنا ان ربنا كاتب رزق للراجل دة لعلاج بنته واستخدمنا احنا لتوصيله رغماً عن أنوفنا كلنا!!!
ومن وقتها وأنا بطلت أحسبها و أيقنت إن رزقي جاي جاي.
أما أنا علي بس أسعي وأدعي وأتوكل على الله وأنا متأكد ان اللي مكتوب لي جاي لي جاي لى
علق بشيء تؤجر عليه ليصلك كل جديد واعمل متابعة