الاسطى اسلام

كنت لابس أشيك بدلة عندي 
وفي إيدي بوكيه ورد وباضرب الجرس وخاېف كأني داخل على امتحان ثانوية عامة لحد ما الباب اتفتح. 
اتفضل يابني
يزيد فضلك يا عمي.
دخلت قعدت وعمال أهز رجلي من التوتر
إشمعنا جاي لوحدك هو الحاج تعبان ولا ايه
لا الحاج والحاجة متوفيين.
ربنا يرحمهم يارب وانت ماعندكش إخوات
عندي إسلام أكبر مني.
شكله مش راضي عن الخطوبة علشان كدا مجاش.
لا لا والله حصله ظروف بس والمرة الجاية هنجيلك سوا.
ماشي يا سيدي ندخل بقي في الموضوع 
اه ياريت.
قولتلي في المكالمة إن اسمك احمد صح 
بالضبط يا عمي.
وشغال ايه بقي يا احمد 
أنا معيد في كلية هندسة وميكانيكي.

درست هندسة ميكانيكا يعني
لا ميكانيكي في ورشة عربيات.
معيد في الجامعة وميكانيكي دا ازاي دا 
ليا ورشة انا وإسلام ورثناها من أبويا الله يرحمه وشغالين فيها سوا من وانا لسه عندي ٧ سنين ف معايا الصنعة يعني ولسه ماسبتهاش.
ملامح وشو إتغيرت
ومبتتكسفش لو طالب من طلابك جه يصلح العربية عندك 
لا
شقتك جاهزة على كدا 
اه الحمد لله البيت بتاعنا شقتين والعروسة تختار منهم اللي تعجبها.
اكيد الشقة قديمة مش انت وارثها من الحاج الله يرحمه 
لا والدي ووالدتي ماتوا في حاډثة ووقتها كنا مأجرين شقة والشقتين دول جبناهم قريب من تعبنا.
ده انت أسطى شاطر من زمان بقي.
من وانا عندي ٧ سنين.
بسم الله ما شاء الله واخوك كان كبير وقتها صح !
لا كان عنده ١٣ سنة بس.
انت بتتكلم بجد 
والله بجد.
طب احكيلي كدا يابني قدرتوا تعملوا كدا ازاي..
بعد ما أبونا وأمنا ماتوا باسبوع إسلام أخدني في حضنه وقالي محدش هينفعنا ولا هيقف جنبنا غير ربنا ولو فضلنا كدا مش هنلاقي ناكل وهنعيش على الصدقة هنفضل قاعدين كدة مستنيين الناس تجيبلنا أكل ولا ننزل نشتغل زي الرجالة ونصرف على نفسنا من الصنعة اللي علمهالنا أبونا !
ساعتها قررنا نفتح الورشة تاني في الأول الناس كانت بتجيلنا علشان عيال صغيرة ومالهمش حد ويعطفوا علينا بس شغل الأسطى إسلام كان الله ينور فللي ييجي مرة بيرجع اتنين وتلاتة واربعة.
الورشة بدأت تكبر وزباينها تكتر وجبنا ناس يشتغلوا معانا والأسطى إسلام أول ما جمع مبلغ كويس أخدني من إيدي ورحنا اشترينا حتة أرض ومع الوقت والشغل ربنا كرم لحد ما بنينا شقتين كبار وكتب واحدة باسمو والتانية باسمي.
كنت باشتغل وانا في الدراسة لكن اخويا مرضيش يكمل تعليم قالي كمل انت بس وماتشغلش دماغك بيا ويقولي هنسيب الورشة لمين دي رزقنا الوحيد من ربنا ومن غيرها بيتنا هيتخرب.
بعد كدا دخلت ثانوية وماكانش بيخليني انزل معاه الشغل ويقولي