أنا هطلقك
بخلف ... تقعدي معايا و ميبقاش عندك اطفال ولا نتطلق و يبقي عندك اطفال ... الحلين اسوء من بعض يا بسمه
الدكتور قال إن في أمل و أن...
أنا وأنت عارفين أن الدكتور قال كده عشان ميحبطناش ... لكن الحقيقه واضحه زي الشمس أنا مش هخلف و دا الي أثبته كل دكتور كنا بنروحله و كان بيقول نفس الكلام
بس انا مش بثق في الدكاتره و أنت عارف
في الله ... الي اكبر مني و منك و من كل الدكاتره الي روحنالهم ... واثقه في رب المعجزات ... نسيت السيده مريم لما حملت في سيدنا عيسى عليه السلام بدون ما يقرب منها بشړ ... طب نسيت سيدنا زكريا عليه السلام لما ربنا رزقه بسيدنا يحيى عليه السلام و امرأته كانت عاقر و هو كان راجل كبير في السن .... نسيت السيده اللي كانت بتروح لسيدنا موسى و تترجاه يطلب من ربنا يرزقها بأطفال و هي عاقر و لما راح و طلب من ربنا قاله أن كتب في قدرها أنها تكون عاقر و بعد مده زمنيه ربنا رزقها بأطفال ولما تعجب سيدنا موسى و اتكلم مع الله عز وجل قاله دعاها غلب قدري ... ايه نسيت أن الدعاء بيغير القدر ... احنا امالنا مش في الدكاتره احنا امالنا في ربنا ... و الامل دا عمره ما هيتقطع مهما الأسباب اتقطعت ... أمالنا في الله يا مالك
مالك
نعم
لو أنا الي كنت مش بخلف كنت هتطلقني
فتح عينيه و اتعدل
أنت بتقولي ايه
مالك اتعصبت كده
ليه
عندك شك في حبي ليكي
ولا واحد في الميه
يبقي أنت كده جاوبتي علي سؤالك ... حبي ليكي اكبر من اي حاجه في الدنيا دي يا بسمه
قرب مني اكتر و حط ايده الاتنين علي وشي
بسمه انا لو قالولي قبل ما اتجوزك انك مش بتخلفي كنت بردو اتجوزتك أنت بنتي قبل ما تكوني مراتي
أنت عندك شك في حبي ليك
يبقى ليه متخيل اني ممكن اختار الامومه عليك ... مين يكره العيال بس لو مش منك أنا مش عايزاها ... أنا بس عايزه نفضل أنا وأنت سوا نشبع من بعض قبل ما يجي عيل ياخدني منك
ياخدك مني !!
اه طبعا اومال فاكر ايه ... وهحبه اكتر منك يكون في علمك بقا
يا سلام
اه طبعا مش حته منك
سكت و بعدت ايده عني و اتنهدت بتعب فقرب مني تاني بقلق
بسمه
المره دي بصتله بنظره مليانه تعب و قهر ... نظره
