قومى اسقى اخوكى
انت في الصفحة 1 من صفحتين
-قومي اسقي أخوكي يبت
-وهو رجله اتكسرت ولا أي ما يقوم يسقي نفسه؟
رمت عليا الشبشب:
-عايزاه يقوم يسقي نفسه وأنتِ قاعدة! قومي يبت.
قومت وأنا بشتمه في سري خصوصًا لما نرفزني أكتر وطلعلي لسانه علشان يغيظني، وهو معاه حق الصراحة تتقال أصل ماما هي اللي نفخته.
-امسك ده فيه راجل سقى كلب ودخل الجنة وأنا بسقيك علشان آخد فيك ثواب.
-لا يا حبيبي أنت مية فل وعشرة وأنتِ يا مسحوبة اللسان ماشي أما وريتك.
جريت على جوا أوضتي ومستنيتش صراحة لأحسن تحدفني بالكوباية الإزاز اللي في أيدها.
-ماما الحقي مروان فتح دماغ رهف.
-يا خړابي هي فين؟
كنا بنلعب في الجنينة وبعدين مروان كان عايز يوقعلنا نبق فبقى يرمي طوب وبعد كده نبدأ نلم النبق اللي يقع، بس رمى طوبة ومخدش باله أني تحت قامت نزلت على راسي اتفتحت واتغرقت ډم.
-تعالي أوديكي للدكتور بسرعة.
مكنتش عارفة آخد نفسي من كتر العياط والخضة وماما نزلت دماغي تحت الحنفية تغسل الډم وبعدين حطت عليا فوطة وضغطت على مكان الډم وخدتني للدكتور وخيطلي 3 غرز.
-تعالالي يبن ال**** بقى تفتح دماغ أختك وأنا اللي سايبكم ومطمن وأقول أنا في الشغل وسايب معاهم راجل؟ كده متخليش بالك من أخواتك يا زفت؟
مروان كان بيبكي ومش ملاحق تعنيف من بابا ولا ماما، بس بعدين ماما خدته في حضنها وبدأت تهديه وبتحاول تهدي بابا عليه وكفاية اللي خده.
-ما كفاية يابو مروان كده عالواد ده مهما كان لسة عيل.
-اسكتي أنتِ ما دلعك ده اللي بوظه وخلاه مش مسئول ولا واعي لتصرفاته، وبدل ما يعتذر ولا يحاول يساعد أخته سابها وجري من البيت، يا فرحتي بيك يا راجل البيت.
-حقك عليا يا بابا أنا آسف ومش هعمل كده تاني.
بابا بحزم -تعتذر لأختك وتبوس دماغها ويا قبلت اعتذارك يا لأ.
مروان قرب مني وبصلي بندم حقيقي:
-حقك عليا يا رهف أنا آسف.
-خلاص متعيطش طيب.
ابتسم ومسح دموعه ببطن كف أيده -يعني مش زعلانة مني؟
-لأ.
بص لبابا بفرحة:
-قالت مش زعلانة يا بابا.
-قرب وبوس دماغها.
مروان پخوف:
-حاضر حاضر.
بابا اتكلم: أنا كلمت واحد صاحبي عنده ورشة نجارة من بكرة هتنزل تشتغل معاه وطول فترة الأجازة هتشتغل وفي الدراسة تهتم بمذاكرتك وبس.
ماما حاولت تعترض:
-حرام عليك ده جسمه ميستحملش الشقا ولا التعب.
-بكرة يتحمل وعضمه ينشف، لكن طول ماهو تحت جناحك مش هيتعلم ولا هيبقى راجل.
-أنا بعمل اللي أبويا عمله معايا ومع أخواتي ولو شايف أنه قسى علينا أو تربيته كانت غلط مش هكررها مع ابني، وبعدين أنا ماليش دعوة بتربية الأهالي التانية أنا راعي ومسئول عن رعية اللي هم ولادي مش ولاد الجيران.
