انت ازاى تقنع بابا

دفع لأذى مستخبي جوا الجوازة دي لو كانت تمت المهم بس متيأسش وتلجأ لربنا وهو قادر يحلها في غمضة عين النهاردة بعد ما نروح متنساش تصلي ركعتين لله وسيبها على الله وهتتحل يا صاحبي.
ابتسمت أكتر وهزيت راسي وأنا بفتكر كل مرة بنيجي نقعد فيها نصيح على أي شيء مضايقنا ونشرب كوبايتين شاي ثم يختم عصام القعدة بالكلمتين دول كنوع من التذكير وبعد ما بنروح البيت بقلوب خالية من تقل الهموم وبنصلي ركعتين لله بنبدأ نلاقي الدنيا اتصلحت مش عشان إحنا اللي حليناها لكن لإن ربنا كريم عالم بإننا منقدرش نمشي ولو خطوة من غير توفيقه وفضله وعشان كدا بييسرها من عنده دايما.
شوفت الخيبة اللي أنا فيها يا عدي
ضحكت
خيبة إيه بس يا أمي ربنا ما يجيب خيبة.
الموكوسة قالت مش عايزة مايكرويڤ عشان الفرن هيعمل اللي بيعمله وقولنا ماشي قالت مش عايزة غسالة هدوم للأطفال عشان إهدار وحاجة ملهاش لازمة والغسالة الكبيرة تعمل اللي هتعمله وقولت ماشي لكن مش عايزة نيش! بالله عليك دا يرضيك يا عدي
ضحكت على تعبيرات وشها المنفعلة وقبل ما أتكلم لقيت همس جاية من المطبخ وهي شايلة صينية العصير ومكشرة بضيق.
برضو اشتكيتيله يا ماما هو إحنا مش هنخلص من حوار النيش دا
لا مش هنخلص طول ما انتي فارساني كدا مش هنخلص.
نفخت بغيظ وهي بتحط الصينية بغيظ وبتناولني كوبايتي وأنا بتلقائية ابتسمت وأنا بشكرها بهمس خاڤت يشبهلها سابتنا والدتها وراحت المطبخ وهي قعدت بغيظ وربعت إيديها ولا كإني السبب في زعلها وجاية تتقمص مني!
ضحكت بتلقائية عليها وأنا بقرب منها شوية وبعد ما كنت هتكلم لقيتني اتنهدت فجأة وأنا ابتسامتي بتوسع وبحمد ربنا من جوايا عشان عوضني بهمس بعد أربع سنين عصام كان قرب يحلف بالله إني اتعقدت من الستات فيهم لحد ما خطبت همس بصدفة غريبة لما مراة عمي رشحتهالي وبعد سنة واحدة من الخطوبة كتبنا الكتاب ودلوقتي بنحط اللمسات الأخيرة في الشقة عشان هنتجوز كمان شهرين!
فوقت لما لقيتها باصة للأرض بخجل وبابتسامة لسة مرسومة على وشي اتكلمت
متأكدة مش عايزة نيش يا همس همس بجد أنا معنديش مانع نجيب نيش ولسة معايا الحمد لله فلوس تكفي وزيادة.
رفعت راسها وهي بتهز راسها بتأكيد.
أنا مبحبش وجوده ومش هستخدم حاجة منه يا عدي وبعدين أنا وانت متفقين من الأول إننا هنعمل مكتبة بدل النيش ولا انت نسيت
ابتسمت وأنا بهز راسي بلأ
لا منسيتش بس برضو فكري تاني عادي.
لا أنا مش حابة أكركب الدنيا وأزحم الشقة بحاجة مش هستعملها الحاجات اللي كانت هتتحط فيه الحمد لله لقيتلها مكان في المطبخ لإنه واسع ما شاء الله ومكان النيش هنعمل مكتبة زي ما كنا متفقين عادي كدا كدا الاتنين هيكونوا بنفس التكلفة تقريبا بس أهي المكتبة هنستخدمها وهننقل فيها كتبنا إحنا الاتنين بدل ما نبيعهم أو ناخدهم معانا ويبوظوا من الركنة في أي مكان.
هزيت راسي من تاني وأنا مش قادر أسيطر على ابتسامتي اللي بتوسع كل ما بتتكلم ودماغي مش قادرة تستوعب أنا عملت إيه حلو في حياتي عشان ربنا يعوضني بواحدة زي همس!
جميلة مراعية بسيطة وساعات بحس إن حتى نبرة صوتها معبقة بالحب!
ضحكت من مجرد الفكرة والكلام الغريب اللي بقى ييجي في بالي كتير بسبب الروايات الرومانسية الغريبة واللي هي عكس ميولي تماما اللي بتقرأها وبتجبرني أقرأها معاها عشان أحكيهالها بعد ما أخلصها لكن بمجرد ما جت في بالي تنهيدتها اللي بتصاحب تعبيرها عن إعجابها
بسردي لأي رواية رغم إنه يكاد يكون سرد كوميدي أكثر منه رومانسي زي ما هو مفروض رجعت أبتسم من تاني وأنا بملي عنيا بجمالها ومن جوايا بحمد ربنا اللي استجاب لدعوة دعيتهاله من كام سنة فاتوا واختارلي الخير اللي ريح قلبي ورضاه.
يمكن ما زلت بعافر ولسة الدنيا سيئة وصعبة عليا شوية لكن الأكيد إنها أهون بكتير مع وجود شريك مقدر كل دا شريك عارف فعلا يهونها عليك مقدر اللي الدنيا فيه رغم إنك مبتشتكيش والأكيد إن أكيد كل الهموم بتهون بوجوده فما بالك لما بيكون الشريك دا همس!
تم.
متنسوش تشاركوني رأيكم سواء سلبي أو إيجابي عشان بيساعدني أطور من نفسي.