فسخت خطوبتى بقلم منة_العدوي

فسخت الخطوبة قبل فرحك بأسبوعين يا رهف!
قلعت الكوتشي وروحت قعدت على الكنبة أخدت نفس عميق واتنهدت
أه يا خالتو وأرجوكي مش عايزة اتناقش في الموضوع ده.
يا بنتي..
قاطعتها بإرهاق
من فضلك يا خالتو أنا سبت البيت عشان مش حمل النقاش مع ماما وبابا فمتكونيش أنت كمان.
اتنهدت وهزت راسها بهدوء ابتسمت ليها بإمتنان
شكرا.
ابتسمت ليا واتحركت من قدامي تجاه المطبخ

عمك زمانه على وصول فهتاكلي معانا والموضوع ده مفهوش نقاش.
ضحكت بخفة وأنا بسند راسي على الكنبة وبغمض عيوني
من عيوني حاضر.
يعني مش ناوية تفهمينا أي السبب
بلعت الأكل بصعوبة بصيت على طبقي وأنا بحرك الشوكة بعشوائية في الأكل بتوتر
خالتو طبطبت على إيدي بحنية وابتسمت
سيبها على راحتها يا ممدوح هي لما تحب تحكي هتقول.
رفعت وشي لخالتو وبصيت لها بإمتنان فابتسمت
عم ممدوح بص ليا من غير كلام للحظات وكمل أكله
على العموم أنا موجود ومش عايزك تقلقي من ناحية أبوكي مفيش حد هيجبرك على حاجة.
هزيت له راسي وبصيت لطبقي وابتسمت بإستهزاء
أمك رجعت تتصل بيا تاني.
سبت التليفون من إيدي واتعدلت في قعدتي وبصيت لها مرت ثواني أخدت نفس عميق
مش عايزة أكمل في علاقتي بطارق.
قربت منها وقعدت قصادها مسكت كف إيدي وبصتلي
سمعاك.
مش بكرهه بس برضه مش بحبه مش الشخص اللي يشبهني مش دا اللي بدور عليه..أنا يوم لما اتقدم ليا مكنتش موافقة عليه بس ماما وبابا بيحبوه بابا شايفه مناسب جدا ليا ماما شايفاه خلوق..منكرش إن أخلاقة ممتازة شكله حلو مثقف ولكن أنا مش عايزاه فضلوا يضغطوا عليا ويقولولي أديله فرصة هتحبيه دي مجرد خطوبة تقدري تسبيه لو مرتحتيش مرتحتش وقولتلهم بس ضغطوا عليا تاني عشان أديله فرصة كمان ولكن أنا خلاص زهقت مش عايزة أكمل معاه
يعني أنت مش حابة طريقة الإجبار من أهلك!
لاء مش كدا بس..
أحكي يا رهف سمعاك
رفعت وشي وبصيت في عيونها وأتنهدت
شخص أنطوائي خجول زيادة عن اللزوم ودا مش من صفة الرجالة
خالتو أنا شخصية اجتماعية بتحب الهزار والفرفشة بتحب تتكلم بتلقائية پتكره الصمت..مش عارفة اوصفلك الموضوع إزاي بس هو مختلف عني تماما أنا بقيت بدايق من تصرفاته..
قرر في مرة يخرجني لما قولت له على اللي بيدايقني منه عزمني في مطعم وكنت واخدة أخويا الأصغر مني كمحرم نظرنا لأننا لسه مكتبناش الكتاب بس كان متوتر زيادة عن اللزوم رغم إن مفيش حاجة تستدعي لتوتره دا كان مكسوف يتكلم ويطلب اللي حابه لدرجة إن اخويا هو اللي اتكلم مكانه ودا مرض أصلا يا خالتو لازم يتعالج منه..إحنا مختلفين تماما يا خالتو مش متوافقين.
لسه هتتكلم التليفون رن كانت والدة رهف كنسلت عليها ولسه هتتكلم رجعت ترن تاني ردت عليها
أيوا يا نجلاء
ممكن تهدي..سبيها عندي يومين كدا أو على الأقل لحد بكره
متقلقيش أنا وعمها هنحل الموضوع ده بس سبيها أنت وأهدي عليها
لا بلاش تكلميها دلوقت..حاضر