انت ازاى تقنع بابا
قادر على المصاريف بتتجوز ليه.
انت قالع دبلتك دا انت حلا لو شافتك هتعلقك.
مردتش على تريقة عصام صاحبي واكتفيت بإني أتجاهله وأنا صابب كل تركيزي على التصميم اللي شغال عليه وأنا دماغي لسة بيتردد فيها صدى صوتها وكلامها.
عدي.. انت كويس يا صاحبي
بصيتله وهزيت راسي من غير كلام بحركة ملهاش معنى وهو بعد ما كان هيتكلم طبطب على كتفي وسكت راح ناحية اللاب بتاعه ورجع لشغله وأنا من غير تفكير كتير رجعت لشغلي من تاني وأنا دماغي لسة مش فيا وكل اللي بيدور جواها هو سؤال واحد.. ليه
انتبهت لعصام اللي كان واقف باصصلي بتركيز وبعد دقيقة من الصمت وقفت معاه وأنا بقول بخنقة وبلم حاجاتي وبقفل اللاب
أنا هاخد بقية اليوم أجازة.
وسيبته ومشيت من غير ما أستنى رده وأنا دماغي لسة بتلف حوالين نفس السؤال.. ليه
ليه هي مصبرتش
ليه كان لازم تعمل اللي في دماغها
وليه الجواز مش أسهل من كدا
ليه!!
هزيت راسي بماشي وأنا بطلب بالفعل وبعد عشر دقايق كان الشاي قدامنا وأنا وهو قاعدين قصاد بعض في صمت غريب!
أنا وحلا سيبنا بعض.
ومكنش غريب أسمع شهقته المتفاجئة وهو صوته بيعلا وبيقول بذهول
انت بتهزر! سيبتوا بعض بجد
هزيت راسي بآه وأنا ببعد عيني عنه وببص على مدخل العمارة اللي قصاد القهوة واللي هو عايش فيها وفضلت مثبت عيني عليه.
هزيت كتافي ببساطة
متفقناش.. كل شيء قسمة ونصيب.
طبطب على كتفي بالراحة فغمضت عيني جامد ومن تاني جملتها رنت في ودني بصوت عالي وانت طالما مش قادر على المصاريف بتتجوز ليه نفخت بخنقة وأنا بحاول أسيطر على بعض الأفكار السيئة اللي بدإت تسيطر على دماغي وبعد كام دقيقة فتحت عيني وأنا ببص لعصام وبتكلم
فضل باصصلي لثواني وكإنه بيحاول يتأكد أنا كويس ولا لأ وبعد دقيقتين اتكلم وهو بيبعد عنيه عني وبيرفع راسه ناحية بلكونة شقته
الحمد لله.. عايش.
ومالك بتقولها من غير نفس كدا
ابتسم وهو بيرجع راسه لورا وبيغمض عنيه
عادي أصل دا العادي يعني.
حاسك مش مظبوط يا عصام.
بصلي وهو بيتعدل في قعدته
أنا بفكر أحول لحسن من المدرسة.
هتحوله ليه
هز كتافه وهو بياخد بوق شاي
المصاريف تقلت يا عدي ومصاريف البيت لوحدها ساحبة كل حاجة ومع حمل نهلة وظروف ولادتها اللي خلاص بتقرب مش لاقي حل غير كدا نهلة كانت بتفكر تقعده السنادي خالص بس أنا قولتلها نحوله وبلاش مدارس خاصة ونوديه مدرسة حكومية وخلاص ومنبقاش ننزله غير للامتحانات طالما خايفين عليه.
بس يا عصام.. انت.. يابني المفروض إن مرتبك انت بالذات بعد الترقية اللي فاتت دي يكون بقى كويس فليه كدا
انت مش عايش في الدنيا يا عدي ولا إيه انت فاكر الغلاء اللي إحنا فيه دا على حد الأجهزة الكهربائية ولا تجهيز الشقق وبس دا على كله يا حبيبي يا عدي أنا باجي على آخر الشهر بكون مفلس بمعنى الكلمة أنا بقعد آخر كام يوم في الشهر ماشي بخمسين جنيه في جيبي ولو حسن عاز حاجة بصرفهم عليه وأفضل على الحديدة لحد ما أقبض ولولا إن نهلة الله يكرمها بتاخد أول كل شهر مصاريف الأكل من المرتب وتدبرها هي بمعرفتها مكناش هنلاقي ناكل على آخر الشهر من كتر المصاريف وطلبات حسن اللي بتزيد كل يوم عن التاني وبعدين دلوقتي
